2016-09-12 细细粒 原点模型
昨日(9月11日),由狂热模型俱乐部主办嘅模型制作交流赛系位于广州陈家祠地铁站附近嘅“转角遇到爱”休闲餐厅顺利举行。 虽然昨日一直落雨,但系都阻挡唔到一班俱乐部成员嘅热情,大家都好早就到达现场,有啲模友甚至拖儿带囡,真正做到“热爱模型就从娃娃抓起”。 到场嘅模友都急不及待咁将自己嘅作品摞出来show俾大家睇。 每一次嘅聚会都系一次相互学习交流嘅好机会。 今次嘅交流赛采用嘅系盲选互评制度,即由各位到场嘅俱乐部成员系唔知作品制作者嘅前提下相互评分,然后由俱乐部会长读出各个作品嘅最终分数,尽力做到公平、公正又公开。 经过一轮激烈嘅评分角逐之后,由会长读出各个作品嘅最终得分,比赛始终系比赛,分数差距比较大,自然有人欢喜有人愁了。 最终由呢位有啲怕丑嘅靓仔制作嘅RX-78-3 G3高达获得全场总冠军。 颁完奖之后,就系有趣嘅有奖问答环节了,现场气氛高涨,大家都兴致十足,系度再次多谢由Anubis提供新安洲专用地台作为部分奖品。 会长表示,举办今次嘅交流赛主要都系想大家有一个交流学习嘅机会,友谊第一,比赛第二。佢更透露,11月中旬仲会举办一场有关扎古主题嘅模型比赛,想知道更多关于呢场比赛嘅详细信息,敬请留意原点模型嘅专题报道。 文章嘅最后,我地一齐黎欣赏一下今次嘅冠军作品RX-78-3 G3高达。作者对呢只G3高达作出左唔少嘅改动,删除左部分刻线嘅同时,更对散气孔进行改造,令胸部位置更有层次感,可见作者系细节方面落左唔少功夫。
|